Sisili es popl indigen de Region *Autonom Sisilian in Italia sudik. Ili es frekuente portreted kuale multe orgulos di sue insul, identikitet e kultur e it es ordinar, ke ili parl di se kuale sisili plu ka kuale itali. Johan Volfgang fon Göte (Johann Wolfgang von Goethe) dikav: "Visavar Italia sine visavar Sisilia es no visavar Italia totale, kause Sisilia es klavi ad omni-kos."
Habitanti prim de Sisilia mensioned in histor es tribui de sikani e siseli, ki av doned nom modern ad Sisilia. Flag sisilian es konsidered kuale simbol regionik. It esav prime adopted in anu 1282, po Adorasion Vesprik Sisilian (rebelasion kontr reg fransian). Sie tri gambi kurvik suposable represent tri punkti de insul Sisilia aut. Epok auratr de poesi sisilik komensav in komens de sekul desters per Skol Sisilik, kel esav multe influensos. Tradision oral lud rol grand in *folklor sisilik. Anekdoti di vivasion de Djufa (Giufà) trans-donant mitadi moral es parti de kultur sisilik.
Negligante ke gastronomi sisilik es ordinare asosied ko edad marik, et karn gusik, agnelik, kaprik, kuniklik e meleagrik es truvabl. Nupti sisilik es prodigik, kar e tradisionik. Ekles katolik es important in vivasioni de sisili. Un eks festi religios sisilik es sken de natasion vivik durantu nativitet. Fest ne-religios leplu important es karneval sisilik.
Idiom sisilik aparten a grup *romanik. It es et parled kelk-partie in Kalabria e Apulia in Italia sudik; it avav influens grand ad lingu maltesik. Idiom sisilik es protektand e promovand sekuantu Kart Europan de Lingui Regionik u Minoritetik. Nomi alternativik de idiom sisilik es kalabrik-sisilik u sikulik. Term "kalabrik-sisilik" signifik, ke form de idiom sisilik u dialekt proksim ad it es parled in Kalabria sentrik e sudik. On divin, ke idiom sisilik av milioni de parleri. Poeti sisilik kelkfoa skrib per idiom sisilik.
Sisili mult es bilinguik e italike e sisilike. Idiom sisilik es used kuale lingu ofisik noloke, no ipse interiore de Sisilia. It es ofisike rekonosed sole in statuti munisipal de urbi sisilian, pro eksempl Kaltadjirone (Caltagirone) e Grammikele (Grammichele), keloke valor historik e kulturik ne-alienabl de idiom sisilik es proklamed. Da uniasion de Italia (1860-1861), idiom sisilik av esed multe influensed per lingu italik (toskanik). Parlament Regionik Sisilian av nelonge voted pro instruasion de idiom sisilik kuale parti de *kurikul skolik *primari, ma sole fraksion de skoli instru it sitempe. Tel-kos signifik, ke it no ses adoptar vokabli e formi gramatikal italik tante, ke sisili mult aut no potes perspetar usasion korekt e ne-korekt de idiom sisilik. Dialekt italik regonik av in-urged in idiom sisilik, leplu observable in parlasion de generasion yun.
Movasion Nedependantismik Sisilian esav aktiv in anui 1943-1947. Suksedanti de ist movasion separismik usk sidiurne propos nedependitet de insul su Italia. Et Alians Sisilian es partis politik *autonomismik e nasion-*konservatismik minim.